Över de Geschicht vun dat Museum

Dat fung an, as de Tönner Börgermeister Ehrich in dat Johr 1902 de Lüüd ut de Stadt opreep: se schullen  ole Saken – „Alterthümer“ spennen. De hebbt denn ok ganz gau den Grundstock tosamensammelt. Eerstmal harr de Stadt Tönn‘ twee verscheden Steden, wo man de Saken ankieken kunn. An’t Enn vun dat Johr 1912 övernehm de domalige Kreisverwalten de Sammlung as „Heimat-Museum des Kreises Eiderstedt“. 1933 schull man de Kreis oplösen, do hett man de Naam vun dat Huus wedder ännert. Siet denn gifft dat dat „Eiderstedter Heimatmuseum“.

Vele Börgerslüüd schenken dat Kreismuseum wat, dorto kemen Arvstücken. So worr de Sammlung bet hen na dat Enn vun den tweten Weltkrieg ümmer grötter. Kofft hett man selten mal wat. Besünners verdeent um dat Huus maak sik Dr. Geerkens. He weer vörher Landweertschopsdirekter in Ollenborg, later weer he in Berlin. Vun 1911 bet 1928 harr he dat Leit un maak dat Museum in de Tiet ümmer grötter. Na em keem Wilhelm Jensen ut Garrn. He weer dor vun 1928 bet 1942, weer aver al vörher Restaurater in’t Museum. De Landskonservater vun de Provinz Sleswig-Holsteen harr em den Opdrag geven.

In den Loop vun den letzten Krieg stünn allens still in’t Museum, un veles hett leden dör Wind, Natten un Küll. As de Krieg to Enn weer, harr man de Objekten utlagert. Veles is dorbi verloren gahn, mag ween, dat welk Lüüd wat klaut hebbt.In dat Johr 1946 hett de eerste niege Kreisdag beslaten, dat en niege Museum inricht warrn schull. Dat harr de britsche Militärverwalten vörher genehmigt. Dat weer nu in St. Peter (dat keem eerst 1967 mit Ording tosamen), denn in Tönn‘ weer keen Huus mehr dorför dor. Merrn in St. Peter söch man en Eiderstedter Huus vun 1752 ut, bekannt as „Huus Jensen“ na den letzten Besitter. Wat man nu frisch utstellen kunn, weer nich mehr ganz so as fröher. Vele vun de weertvullen Objekten kunn man restaureren. De Situatschoon worr beter, as man 1976 de „Stiftung Nordfriesland“ inrichten dee. Nu kunnen Lüüd, de wat vun Kunstgeschicht verstunnen, allens inventariseren un sorteren. Un nu kunn man ok Delen ankopen. Ehrenamtliche Hölpers betreuen dat Museum.

Vundaag:

In dat Johr 1998 änner sik de Status vun dat Museum wedder mal ganz stark: de Kreis Nordfriesland wull dat Museum nich mehr ünnerholen – vunwegen de leddigen Kassen. De Oortsgemee nde St. Peter-Ording hett dorna dat Museum övernahmen. Se hett den Fördervereen „KulturTreff“ den Opdrag geven, sik um dat Museum to kümmern. Düssen Vereen hett man extra dorför grünnt. Af 2004 is dat Museum denn ganz un gor wedder sülfstännig. Allens an Inventoor güng an dat „Amt Eiderstedt“, man hett dat in en niege Archiv op de Halfinsel inlagert. Jüst so in de Tiet, as dat Museum vör 104 Johr grünnt worr, is dat Museum nu wedder en Regionalmuseum – dat Museum vun de Landschop Eiderstedt.

Dr. Dieter Undeutsch, Oktober 2004

Ins Niederdeutsche übertragen von Marianne Ehlers, Mai 2020