Leidbild vun dat ‚Museum Landschaft Eiderstedt‘

Dat Museum is dat kulturhistoorsche Museum vun de Landschop Eiderstedt. Dat hett sien Oog besünners op de Relikten ut de Geschicht vun de Halfinsel. Dat Museum sammelt un forscht, dat wohrt un maakt Utstellen, wo man wat över de Kulturgeschicht vun de Landschop to weten kriggt.

Dat ‚Museum Landschaft Eiderstedt‘ (MLE) will dat Intresse vun de Börgerinnen un Börger in St. Peter-Ording un in Eiderstedt för de Kultur fröher un vundaag in de Gang bringen un stütten. Dat will gliektiedig ok de Gäst in de Region wiesen, wat kulturell besünners in de Landschop is.

Dorto hett sik de Vereen, de dat Museum bedrieven deit, düt vörnahmen:

• dorbi hölpen: dat Museum plegen un in de Gang holen
• de Kulturlandschop Eiderstedt un den Kuroort St. Peter-Ording mit sien Doon för Touristen attraktiv holen
• na buten hen dat kulturelle Leven intensiv maken mit Vördrääg över Literatur, Musik, Theater un Film, billen Kunst un Alldagskultur, Lesen un Snackrunnen
• Jung un Oolt tosamenbringen, dat de Generatschonen sik kulturell verstaht, dat besünners junge Lüüd kreativ ehr Ideen umsetten köönt

Dat ‚Museum Landschaft Eiderstedt‘ schall en Steed ween, wo sik Minschen drapen köönt un wat över ole un niege Kultur vun Eiderstedt lehren köönt, wat all wiederbringen deit, un se dörvt kulturelle Veranstaltens beleven.

Dormit stift dat Museum de Identität vun de Eiderstedter – un Besökers vun buten lehrt hier wat över de Region un de Geschicht.

De Plaan is, dat dat MLE vun de Inwahners vun Eiderstedt un vun uns Besökers vun buten as en Inrichten ansehn warrt, de düchtig to dat kulturelle Weten un Verstahn vun de Landschop bidregen deit un wichtig is för de histoorsche Billen vun Jung un Oolt.

Dör düt Besünnere vun de Halfinsel Eiderstedt un sien Präsentatschoon in dat MLE kriggt dat Huus ok en Bedüden över de Region rut:

• Migratschonen vun dat 8., 11. un 16. Johrhunnert ut de Nedderlannen (vundaag)
• Opkamen vun de geograafsche Landschop dör den Diekbu
• Christendom un Missionsarbeit (s. Landschop vun de 18 Karken)
• De Weertschop wannelt sik radikal dör de Inwannerers vun’t 16. Johrhunnert, dorto entwickeln sik Hannel mit Bootfohrten un Tönner Haven, Huusformen, Drachten, Sitten un de plattdüütsche Spraak
• en rieke Buernstand mit veel Egenweertsinn kummt op, de kriggt Hartogs-Privilegien un kriggt dat torecht, ut de Dreelannen en Ganzes to maken, mit egen Verfaten, deelwies egen Recht un Sülfstverwalten (jüst so gell blots noch för de Insel Fehmarn)
• däänsche Absolutismus, nationalistsche Ordnung in Weertschop, Verwalten un Verkehr, Merkantilismus, besünner Graffkultur, Epitaphien un Scholen
• in’t 19. un 20. Johrhunnert kummt de niege Weertschopstwieg Tourismus op – de traditschonelle Landweertschop geiht torüch

Vunwegen all düt Besünnere vun fröher un vun vundaag geiht dat MLE den Weg dorhen, all Akteuren vun de Landschop tosamen to bringen. So kann man Kunst un Kultur vun hier, Weertschop un Alldagsleven un ok Minschen un Natur utföhrlich wiesen.

Stand Juni 2014

Ins Niederdeutsche übertragen von Marianne Ehlers, Mai 2020